ग्रेस हिमालय काठमाण्डौ २०८२ जेठ २८

बुधबार

काठमाडौँ । राजस्व अनुसन्धान विभागले भारतको नयाँ दिल्लीबाट काठमाडौं चल्ने यात्रुवाहक बसमा फल्स बटम बनाएर अवैध रूपमा कपडा, औषधी र धूप ओसारपसार गर्ने कार्यमा संलग्न ६ जनाविरुद्ध उच्च अदालत पाटनमा मुद्दा दायर गरेको छ ।

विभागले ललितपुर महानगरपालिका वडा नं. २१ निवासी ३१ वर्षीय कृष्ण गोपाल श्रेष्ठसहित ६ जनाविरुद्ध राजस्व चुहावट (अनुसन्धान तथा नियन्त्रण) ऐन अनुसार कारबाहीको माग गर्दै मुद्दा दर्ता गरेको महानिर्देशक चण्डी प्रसाद घिमिरेले जानकारी दिए । 

उनका अनुसन्धान अनुसार, प्रतिवादीहरूले फल्स बटम बनाई सो भित्र लुकाई ल्याइएका सामानको भन्सार नतिरी गैरकानुनी रुपमा नेपाल भित्र्याएको पाइएको छ। यस कार्यद्वारा उनीहरूले करिब रु. २ करोड ५२ लाख ४८ हजार ३ सय ६६ रुपैयाँ बराबरको राजस्व छली गरेको खुलेको छ । 

विभागले ऐनअनुसार सोही रकम विगोका रूपमा असुल गर्न, त्यसको दोब्बर जम्मा रु. ५ करोड ४ लाख ९६ हजार ७ सय ३२ जरिवाना गर्न तथा संलग्नलाई कैद सजाय पनि माग गरेको छ ।

साथै, ओसारपसारमा प्रयोग गरिएको ना. ५ ख ७३१४ नम्बरको सवारीसाधन जफत गर्न तथा अपराध पीडित संरक्षण ऐन, २०७५ अनुसार क्षतिपूर्ति पनि माग गरिएको निर्देशक नवराज अधिकारीले जानकारी दिए ।

समाचार श्रोत नव जनप्रहार