शुक्रबार १८ भाद्र, २०७८
प्रहरीमा भर्ना गरिदिन्छु' भन्दै ठगी गर्ने बझाङका एक युवक कैलालीबाट प्रहरीले पक्राउ गरेको छ । जिल्लाको मष्टा गाउँपालिका–२ का २५ वर्षीय मनोजकुमार सिंहले हाल प्रहरी जवान पदको सम्पूर्ण परीक्षा समाप्त भएको अवस्थामा एक जनालाई ठगी गरेको भेटिएपछि उनलाई जिल्ला प्रहरी कार्यालय कैलालीले पक्राउ गरेको हो ।
पक्राउ परेका सिंहलाई जिल्ला प्रहरी कार्यालय कैलालीले बिहीबार पत्रकार सम्मेलन गरेर सार्वजनिक गरेको बताईएको छ । उनले ठगी गरेको भेटिएपछि सुदूरपश्चिम प्रदेश प्रहरी कार्यालय र जिल्लाबाट खटेको टोलीले बुधबार धनगढीको चौराहाबाट पक्राउ गरिएको जिल्ला प्रहरी कार्यालय कैलालीका प्रहरी उपरीक्षक (एसपी) विश्व अधिकारीले बताएका छन् ।
उनका अनुसार प्रहरी बनाइदिने भन्दै सिंहले पीडितबाट ६० हजार रकम समेत मागेका थिए । सिंहले रकम नदिए प्रहरीको छनोटबाट फेल गरिदिने भन्दै धम्की समेत दिने गरेको प्रहरीले बताएको छ । पक्राउ परेका सिंहविरुद्ध ठगी मुद्दा अनुसन्धान भइरहेको प्रहरीले जनाएको छ ।
