वीरगञ्ज–पथलैया औद्योगिक करिडोर, सिमरामा रहेको जगदम्बा स्टिल प्रालिमा केही दिनअघि भएको तोडफोडको घटनामा संलग्नलाई कारबाही गर्न नेपाल उद्योग वाणिज्य महासंघले माग गरेको छ । यस घटनाप्रति आफ्नो गम्भीर ध्यानाकर्षणसमेत भएको महासंघले जनाएको छ ।

स्थानीय तहमा सञ्चालित उद्योग व्यवसायले जनतालाई रोजगारी र उक्त क्षेत्रका जनताको आर्थिक जीवनस्तर सुुधारमा सहयोग पुर्‍याइरहेको हुन्छ । तर उद्योग समस्यामा परेको मौका छोपी स्थानीय जनता नै जबर्जस्ती उद्योग परिसरमा प्रवेश गरी सरसामान, मेसिन, पार्किङ गरी राखिएका सवारीसाधन तोडफोड गरी ध्वस्त बनाउनुु अत्यन्त दु:खद कुरा हो, महासंघले जारी गरेको विज्ञप्तिमा भनिएको छ ।