अफगानिस्तानको राजधानी काबुल विमानस्थल नजिक गरिएको रकेट आक्रमणमा दुई जनाको मृत्यु हुनुका साथै घटनामा अन्य तीन जना घाइते भएका छन् । अफगान प्रहरीका अनुसार  आइतबार साँझ हमिद कारजाई अन्तर्राष्ट्रिय विमानस्थलबाट उत्तरपूर्वी क्षेत्रमा रहेको एक घरमा रकेट प्रहार गरिएको थियो । आक्रमण कसले गरेको भन्ने खुल्न सकेको छैन । 

घटनाको विस्तृत विवरण आउन बाँकी रहेको अफगान प्रहरीले बताइएको छ । यता, समाचार एजेन्सी रोयटर्सले अमेरिकी अधिकारीहरुलाई उद्धृत गर्दै इस्लामिक स्टेट समूहको अफगान शाखा आईएस-के (इस्लामिक स्टेट-खोरासन) का सदस्यहरुलाई लक्षित गरि सैन्य कारबाही गरिएको जानकारी दिएको छ । अमेरिकी कारबाहीको बारेमा थप विवरण अझै आएको छैन । यस्तै, यो विमानस्थल नजिकैको घरमा आक्रमण भएको रकेटसँग सम्बन्धित रहे/नहेरेहेको पनि खुल्न सकेको छैन ।

यसअघि शनिबार अमेरिकी राष्ट्रपति जो वाइडेनले काबुल विमानस्थलमा आफ्ना सैनिकमाथि भएको आक्रमणको बदला लिने चेतावनी दिएका थिए । बिहीबार विमानस्थल नजिक विस्फोट हुँदा १७० जनाको मृत्यु भएको थियो । मारिनेमा १३ अमेरिकी सैनिक र २ बेलायती नागरिक पनि थिए । बाँकी अफगानी नागरिक रहेको बताइएको छ । शुक्रबार पनि विमानस्थल प्रवेश गेटमा ‘फायरिङ’ गरिएको बताइएको छ । ‘फायरिङ’पछि भागदौड मच्चिएको छ । ‘फायरिङ’ कसले गर्यो अहिलेसम्म प्रस्ट हुन सकेको छैन ।