अन्तर्राष्ट्रिय प्रहरी संगठन (इन्टरपोल) को हराएको सूचीमा रहेको फ्रान्सको राहदानी काठमाडौँमा फेला परेको छ । अध्यागमन विभागले सेनेगलका डियागो एब्ड्रमनीको साथबाट इन्टरपोलको हराएको सूचीमा रहेको १४ ए.आर ७०७७७ नम्बरको फ्रान्सको राहदानी फेला पारेको हो ।

इन्टरपोलले २०७१ मा उक्त फ्रान्सको राहदानी हराएको सूचीमा राखेको थियो । आफ्नो पहिचान लुकाएर अर्को मुलुकको हराएको राहदानीमा शंकास्पद ढंगले यात्रा गर्नुले एब्ड्रमनीको अन्तर्राष्ट्रिय आपराधिक गिरोहहरु सँग सम्बन्ध त छैन भन्‍ने गम्भीर प्रश्‍न उठाएको छ । एब्ड्रमनीले फ्रान्सको राहदानी कहाँबाट ल्याए भन्‍ने खुलाएका छैनन् ।

विभागले राहदानी बरामद गर्ने बित्तिकै त्यसको आधिकारिकताका लागि नेपालस्थित फ्रेन्च दूतावासमा पत्रचार गरेको थियो । अध्यागमन विभागको आग्रहमा नेपालस्थित फ्रेन्च दूतावासले एब्ड्रमनीको साथबाट फेला परेको फ्रान्सको राहदानी हराएको सूचीमा रहेको पुष्टि गरेको हो । राहदानी वाहक फ्रान्सेली नागरिक आपराधिक गतिविधिमा संलग्न रहेको समेत दूतावासले पुष्टि गरिदिएको छ । फ्रान्सका मामाडोभ माकालोभको राहादानी इन्टरपोलले हराएको सूचीमा राखेको थियो । फ्रान्समा उनी चोरी, डकैती लगायत आपराधिक गतिविधिमा संलग्न भएका व्यक्ति हुन् ।

अनुसन्धानमा खटिएका अधिकृत वैकुण्ठ रेग्मीले सेनेगलका एब्ड्रमनीले फ्रान्सको हराएको राहदानी कहाँबाट ल्याए भन्ने विषय पत्ता लगाउन कठिन भएको बताए ।  रेग्मीले भने ,‘ बयानमा उनले फ्रान्सको राहदानी आफ्नै भएको दावी गरेका छन् । तर त्यो राहदानी उनको होइन।’ उनको दावीलाई नेपालस्थित फ्रेन्च दूतावास र अध्यागमन विभागका अधिकारीहरु अस्वीकार गरिदिएका छन् । विभागले सेनेगलका एब्ड्रमनी विरुद्ध जाली राहदानी अन्तर्गत काठमाडौँ जिल्ला अदालतमा मुद्दा दायर गरेको थियो । अदालतले सेनेगलका एब्ड्रमनीलाई पुर्पक्षका लागि थुनामा पठाएको छ ।

सेनेगलको राहदानीमा नेपाल प्रवेश

एब्ड्रमनी २०७६ माघ १ गते सेनेगलको राहदानीमा नेपाल प्रवेश गरेका थिए । त्रिभुवन अन्तर्राष्ट्रिय विमानस्थल उत्रँदा उनले सेनेगलको राहदानीमा आगमन (अराइभल) अनुमति लिएका थिए ।

उतैबाट लुकाएर फ्रान्सको राहदानी ल्याए वा काठमाडौँमा कसैले उनलाई दियो भन्ने विषय खुलेको छैन । उनी नेपाल प्रवेश गरे पनि प्रवेशाज्ञा नियमित गरेनन् । एब्ड्रमनी ५ सय ४४ दिन प्रवेशाज्ञा विना नै नेपाल बसे । गैर कानूनी रुपमा नेपाल बसेका बेला कुनै संयन्त्रले उनीबारे थाहा पाएन । अध्यामगन अधिकारीहरुका अनुसार नेपाल प्रवेश गरेपछि उनले सेनेगलको राहदानी फालेर आफूलाई फ्रान्सको नागरिक भएको प्रमाणित गराउन चाहन्थे ।

यसरी अध्यागमन पुगेका थिए एब्ड्रमनी

नेपाल आएपछि एब्ड्रमनी ठमेलको होटमा बस्न थाले । उनी पछिल्लो पटक ठमेलस्थित होटल आगमनमा बस्दैआएका थिए । होटलमा शंकास्पद गतिविधि देखाउन थालेपछि होटलका कर्मचारीहरु सशंकित बने । होटलका कर्मचारीले कागजपत्र मागे । सेनेगलका नागरिक एब्ड्रमनीले शंकास्पद व्यवहार देखाएपछि होटलका कर्मचारीले पर्यटक प्रहरीलाई खवर गरेका थिए ।

पर्यटक प्रहरीले गत असार २९ गते ठमेलबाट पक्राउ गरी उनलाई अध्यागमन विभाग पुर्‍याएको थियो । अध्यागमनका अधिकारीहरुले सेनेगलको राहदानी मागे तर एब्ड्रमनीले आफू फ्रान्सको नागरिक भएको भन्दै  राहदानी थिए । उनले वयानका क्रममा आफू फ्रान्सको नागरिक नै भएको पुष्टि गर्न खोजे । तर अध्यागमनका अधिकारीहरुले उनी फ्रान्सको नागरिक भएको भन्नेमा आशंका गरे ।

त्यसपछि उक्त राहदानी प्रमाणिकरण गर्न नेपालस्थित फ्रेन्च दूतावासमा पठाए । दूतावासको जवाफपछि अध्यागमनले उनी विरुद्ध जाली राहदानी अन्तर्गत मुद्दा दायर गरेको थियो । काठमाडौँ जिल्ला अदालतले एब्ड्रमनीलाई साउन १२ गते पुर्पक्षका लागि थुनामा पठाउने आदेश दिएको थियो ।