कैलालीमा नेपाल प्रहरीले पैसा असुलेर जुवाडे भगाएको आरोप लागेको छ । हिजो सोमबार साँझ धनगढी उपमहानगरपालिका–३ मिलनचोक स्थित एक रेष्टुरेन्टमा जुवा खेलिरहेको भन्ने सूचनाका आधारमा जिल्ला प्रहरी कार्यालय र सुदूरपश्चिम प्रदेश अनुसन्धान समूह आरआईटीबाट प्रहरीको टोली उक्त स्थानमा पुगेको थियो । जिल्ला प्रहरी कार्यालयबाट प्रहरी निरीक्षकको नेतृत्वमा खटिएको टोली जुवाडेसँग भएको करिब ८ लाख रुपैयाँ बरामद गरेर उनीहरुलाई भगाएको आरोप लागेको हो । ‘हामी साथीभाइहरु सामान्य रमाइलोका लागि बसिरहेका थियौं, रेष्टुरेन्टमा उपस्थित एक ब्यक्तिले भने, ‘त्यही बेला प्रहरी टोली आइपुग्यो । उहाँहरुले रेष्टुरेन्टको घर्रामा राखिएको ६ लाख, सबैको खल्तीमा भएको रकम समेत गरेर थप दुई लाख रुपैयाँ खोसेर लानुभयो ।

प्रहरी स्रोतका अनुसार रकम बरामद गरेपछि जुवाडेहरुलाई पक्राउ गर्नुको साटो छोडिएको थियो । ‘ जुवा खेलिरहेको सूचनापछि जिल्ला र प्रदेशबाट प्रहरी टोली खटाइएको थियो, एक प्रहरी अधिकृतले भने, ‘तर पक्राउ गर्न भनेर खटिएका प्रहरीहरुले रकम असुल्दै उहाँहरुलाई छोडेर संगठनप्रति नै गद्दारी गर्नुभएको छ । जिल्ला प्रहरी कार्यालय कैलालीले भने जुवा खेलिरहेको भन्ने सूचना आएपछि प्रहरी टोली खटिएको तर उनीहरुलाई पक्राउ गर्न नसकिएको खबर छ । ‘हामीलाई जुवा भइरहेको भन्ने सूचना प्राप्त भएपछि टोली परिचालन गरिएको थियो । तर जुवाडेहरु भागिहाले । नगद ८५ हजार रुपैयाँ बरामद गरेका छौं, जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) प्रतीक बिष्टले बताए ।

रकम असुलेर जुवाडेलाई भगाएको भन्ने आरोप निराधार भएको बताउँदै डीएसपी बिष्टले प्रमाणसहित आएमा सम्बन्धित प्रहरीलाई कारबाहीको दायरामा ल्याइने जनाएका छन । तर जुवाडे पक्राउ गर्न खटिएकै प्रहरीबीच समेत लेनदेनमा कुराकानी नमिल्दा विवाद सिर्जना भएको स्रोतको भनाई छ । सोही कारण प्रहरी अधिकारी नै दुईथरी कुरा गर्न थालेका छन् । जुवाडे पक्राउ गर्न खटिएका एक प्रहरी अधिकारीले रेष्टुरेन्टको घर्रामा ५ देखि ६ लाख रकम राखिएको भन्ने सूचनाका आधारमा त्यहाँ पुगे पनि उक्त पैसा नभेटिएको दाबी गरे ।