चार दशकदेखि ग्राहकलाई सेवा दिँदै आएको महोत्तरीको बर्दिबासस्थित गौतम होटलले धनुषाको लालगढमा सुविधा सम्पन्न होटल निर्माण गर्न  थालेको छ । युवा उद्यमी तथा व्यवसायी हिरा गौतमले झन्डै ५० करोडको लागतमा होटल निर्माण थालेको बताएका छन् । समय सापेक्ष बद्लिदो सोच, गौतम होटलको नविनतम अठोट' भन्ने भावका साथ सुविधासम्पन्न आधुनिक होटल निर्माण थालिएको हो । करिब एक बिघा जग्गामा सुन्दर हरियाली एवं प्राकृतिक रमणीय वातावरणयुक्त होटलमा १२० देखि १५० जनासम्म बसोबास गर्न मिल्ने आरामदायी कोठाहरु निर्माण भइरहेका छन् ।

होटलमा सभा सम्मेलन, गोष्ठीका लागि विभिन्न कक्षहरु हुनेछन्। जसमा भित्र र बाहिर गरी लगभग दुई हजार जनाको व्यवस्थापन गर्नसक्ने क्षमता हुनेछ । स्वीमिङ पूल, फिटनेस सेन्टर, सौना र स्टिम बाथ, पर्याप्त पार्किङ स्थललगायत संरचना पनि निर्माण हुँदैछ । थ्री-स्टारको मापदण्डमा होटल बन्दै छ ।४० वर्षदेखि बर्दिबासमा अविच्छिन्न रूपमा गौतम होटल पाहुनाको सेवामा समर्पित रहेको छ।  आफ्नो लोकप्रियताले अति विशिष्ट पाहुनाहरुदेखि सर्वसाधारणहरुलाई सेवा गर्ने मौका यो होटलले प्राप्त गरिरहेको छ ।

पाहुनाहरुको आवश्यकतालाई मध्यनजर गर्दै बर्दिबासभन्दा ५ किलोमिटर पूर्व-दक्षिणमा निर्माणाधीन 'गौतम होटल बर्दिबास प्रालिको संरचना दुई वर्षभित्र पूरा हुने लक्ष राखिएको छ । पूर्व-पश्चीम राजमार्गस्थित धनुषाको मिथिला नगरपालिका–९, बेगाडावरस्थित लालगढमा यो होटल निर्माण भइरहेको छ । होटल व्यवसायका लागि पछिल्लो समय लालगढ एक केन्द्रबिन्दु बन्दै आएको छ । 

बर्दिबासमा एउटा सामान्य रेस्टुरेन्टबाट सुरु गरिएको गौतम होटल समयको रफ्तारसँगै अहिले देशभरि नै लोकप्रिय बनेको छ । गुणस्तरीय सेवा, आतिथ्य सत्कारले युवा उद्यमी गौतमले मनमात्रै जितेनन् करोडौको अर्को होटल खोल्ने योजना बनाउन सफल भएका छन् । होटलका सेवा सुविधाहरुलाई थप अभिवृद्धि गर्दै विगतभन्दा पनि अझ बढी अनुकरणीय बनाउँदै लैजाने प्रतिबद्धता होटल सञ्चालक गौतमले जनाए ।